Serge Madhère, Michel Ducasse ak Lyonel Desmarattes alonè pou 6èm edisyon Festival

Nan yon kominike Association FEL Caraïbes pataje lajman sou rezo li yo samdi 1e me 2024 la, responsab yo devwale non twa (3) ekriven k ap alonè nan 6èm edisyon Festival Entènasyonal Literati Kreyòl (FEL 2024). Sou tapi donè a, nou jwenn : Serge Madhère (Ayiti), powèt, doktè nan statistik ak metòd rechèch, pwofesè inivèsite Ozetazini ; Michel Ducasse (Lil Moris), powèt, tradiktè literè, jounalis, fòme nan domèn lenguistik ak lèt, epi Lyonel Desmarattes ki se ekriven, jounalis, tradiktè literè, manm Akademi Kreyòl Ayisyen. Daprè menm kominike a, FEL 2024 la ap dewoule soti 3 pou rive 8 desanm 2024 la an Ayiti (Pòtoprens, Gonayiv) epi an liy, jan sa abitye fèt depi kèk ane.

Ekriven ki alonè nan Festival Entènasyonal Literati Kreyòl depi 2019

Chak ane, Festival Entènasyonal Literati Kreyòl mete pwojektè sou de oubyen twa pèsonalite, kote li onore yo pou travay yo ak kontribisyon yo nan dinamik pwomosyon ak devlòpman literati kreyòl. Se okazyon kote festival la asire pwomosyon zèv pèsonalite sa yo epi envite piblik la (re) dekouvri travay yo. Men pèsonalite literè ayisyen ak etranje ki pote deja chapo « Envite alonè » depi kreyasyon evènman an :

2019 : Manno Ejèn, powèt (Ayiti – Kanada) ; Hilario Batista Félix (Kiba), powèt, responsab Depatman kreyòl nan Radyo Leta La Havana Cuba; Yves Marie Seraline (Matinik), ekriven, enjenyè kiltirèl;

2020 : Raphaël Confiant (Matinik), ekriven; Jean Euphèle Milcé (Ayiti), ekriven ; Rodophe Mathurin (Ayiti), ekriven, pwofesè ;

2021 : Pierre Michel Chéry (Ayiti), ekriven, manm Akademi Kreyòl Ayisyen ; Lyonel Trouillot (Ayiti), ekriven, responsab Atelye jedi swa.

2022 : Jo – Anne S. Ferreira (Trinidad & Tobago), lenguis, mèt konferans nan inivèsite Uwi ; Guy Gérald Ménard (Ayiti), powèt, nouvelis, pwofesè nan inivèsite Leta Ayiti, manm Akademi Kreyòl Ayisyen.

2023 : Jean Dédé Dorcély (Ayiti), ekriven, atispent, fondatè branch Sosyete Koukouy Santo ; Gregory Rabess (Ladominik), chantè, konpozitè, ekriven ; Vye Ewòl (Ayiti), powèt, responsab Medikaplant, pwofesè inivèsite nan Florid.

Festival Entènasyonal Literati Kreyòl se premye evènman literati kreyòl nan Karayib la. Se powèt ayisyen Anivince Jean Baptiste ki inisye l epi k ap prezide l depi kreyasyon li an 2019, an patenarya ak Fondation Maurice Sixto, Organisation Martiniquaise pour le Développement des Arts et de la Culture (OMDAC), Sosyete Koukouy, Espas Kreyòl, Eritaj kilti kreyòl, Akademi

Kreyòl Ayisyen… Kreye yon espas echanj ak diskisyon sou literati kreyòl, rasanble ekriven, powèt, entèlèktyèl, atis kominote kreyolofòn yo pou yon bèl anbyans kreyòl, kreye espas pou pwomosyon ak difizyon liv kreyòl, travay globalman pou yon kreyolofoni solid e solidè se kèk pami objektif FEL ap rapousuiv yo.

Frantzley Valbrun

The post Serge Madhère, Michel Ducasse ak Lyonel Desmarattes alonè pou 6èm edisyon Festival first appeared on Rezo Nòdwès.