Ayiti anba bal (audio)

Tit: « Ayiti Anba Bal »

Vèsè 1

Ayiti, kri san w ap koule,
Chak jou, se rèl ki mennen lapli,
Maman kriye, papa peri,
Timoun dòmi anba plon lari.

Nan katye se bal kap chante,
Yon lòt frè m tonbe san regrè,
Pèp la fatige, sa fini nèt,
Men tout sa yo ap fè, se mete bal sou tèt.

Refrèn

Bal ap chante, se vi n ap pèdi,
Nou vle libète, men lanmò li chwazi,
Nou vle lapè, men nèg ak zam di non,
Jodi a Ayiti se lanfè sou tè sa a.

Vèsè 2

Timoun grangou ap tann solèy leve,
Pou yo bwè dlo selman pou yo pa tonbe,
Gouvènman ap danse, li ap selebre,
Pandan nou anba flanm dife.

Gen fanmi ki kouri, san pa gade dèyè,
Yon lòt ap priye, men Bondye pa tande,
Paske move zanj yo met men nan wout,
Yo vann peyi a pou pouvwa, pou goud.

Nou pa manje, nou pa dòmi, nou pè soti,
Nou pè vi, nou pè lanmò, nou pè tout bagay.
Yo ba nou bal, yo ba nou mizè,
Men yo di n al danse, al fè kanaval,
Al fete pandan timoun ap mouri grangou.
Ayiti, ou konn sa w ye ankò?
Ou se peyi nou oswa simityè n ap viv la?

Refrèn

Bal ap chante, se vi n ap pèdi,
Nou vle libète, men lanmò li chwazi,
Nou vle lapè, men nèg ak zam di non,
Jodi a Ayiti se lanfè sou tè sa a.

Ayiti, Ayiti…
Kilè l ap chanje…?

The post Ayiti anba bal (audio) first appeared on Rezo Nòdwès.