Mouvman Patriyotik pou Lavi mande pou otorite yo pran dispozisyon pou kwape bandi yo nan peyi a

Retablisman sekirite, yon devwa otorite yo gen anvè popilasyon an daprè MOPAL.

Nan yon nòt ki pote siyati Jean Fritznel Pierre Louis ak Max Theodort, Mouvman Patriyotik pou Lavi (MOPAL) di l santil boulvèse chak jou pi plis fas ak zak kowalisyon gang viv ansanm yo ap komèt sou popilasyon an ak sou byen piblik kou prive yo nan peyi a.

« Mesyedam sa yo pa janm sispann touye ak chase pèp la nan katye popilé yo. Aprè gwoup ame sa yo fin piye epi mete dife nan komisarya ak lèkol, yo pase pran lopital piblik tankou lopital prive » se sa nou ka li nan nòt la, kote li souliye depi plizyè mwa, nèg ak zam pran kontwòl lopital jeneral e yo rive mete dife nan lopital Bernard Mevs la.

Zak sa a, daprè MOPAL, se yon gwo pèt pou gwoup moun ki te fè envestisman sa e pou peyi a an jeneral. Nan sans sa a, MOPAL ap mande otorite leta yo pran tout dispozisyon sa egzije pou fè fas kare ak aksyon malonèt sa yo nan peyi a e degaje prese prese yon fon pou asiste lopital Bernard Mevs ak tout lòt enstitisyon ki viktim anba zak gwoup ame yo.

Pi lwen, MOPAL pwofite mande Sektè Prive a pou bay yon kout men pou retabli lopital la nan fonksyonman nòmal li yon fason pou pèp la kontinye jwenn ti moso laswenyay. Yon lòt bò, li mande gouvènman Premye Minis Alix Didier Fils Aimé a ak KPT a pou kontinye pran tout dispozisyon pou kwape bandi kap fè deblozay nan peyi a, pou tabli lapè ak sekirite pou tout deplase tounen lakay yo, pou lekòl fonksyone san kè kase, pou wout Nò ak Sid debloke, pou lavi kapab retounen toupatou nan peyi a.

À lire aussi:

Un mort et plusieurs blessés dans un accident impliquant un camion de la DGM rapatriant des haïtiens