Ki sa ou dwe konnen sou poz nan pwogram imanitè Biden nan

Depi kòmansman ane 2023, pwogram pawòl imanitè a (I-134A) pèmèt imigran ki soti ann Ayiti, Venezyela, Nikaragwa ak Kiba antre legalman, epi viv nan peyi Etazini pou yon peryòd de zan. Selon plan administrasyon Biden nan, pwogram nan te dwe kontinye apwouve jiska 360,000 aplikasyon chak ane.

Malerezman, pwogram nan ki tap resevwa anpil kritik fè yon ti kanpe akoz  yo dekouvri anpil magouy nan pwoseis aplikasyon yo.  DHS te anonse vandredi a li fè kanpe taanporè sou examinasyon nouvo dosye  pandan lap mennen envestigasyon sou pwoblem magouy yo. Desizyon sa a lakòz anpil kesyon ak enkyetid lakay benefisyè ak fanmi yo.

Pandan avni pwogram nan rete ensèten, men ki sa ou dwe konnen sou poz la, konsekans li, epi kijan ou dwe viv sitiyasyon an.

Pou ki sa pwogram nan fè yon ti kanpe ?

DHS pran yon poz tanporè nan otorizasyon vwayaj pou nouvo benefisyè akoz anpil magouy yo te dekouvri nan yon seri aplikasyon. Administrasyon Biden nan pran desizyon sa a apre revizyon responsab imigrasyon yo te fè pou reponn ak demand nan kad yon rapò Federasyon pou Refòm Imigrasyon Ameriken te pibliye sou kesyon magouy moun tap fè nan pwogram nan.

Ki sa poz la vle di pou moun ki deja apwouve yo?

Moun ki gentan resevwa otorizasyon vwayaj yo kapab toujou antre Etazini si otorizasyon yo toujou valid  epi DHS ba yo admisyon. Men, genyen kèk rapò nan medya ki fè konnen ta gen vwayajè yo pat kite moute avyon pou kite Ayiti samdi pase a. Sitiyasyon sa a te kreye konfizyon ak enkyetid lakay anpil benefisiyè.

Ki sa moun ki ap tann pou aplikasyon yo apwouve dwe konnen?

Si  wap tann aplikasyon w lan apwouve, DHS di lap travay rapid rapid pou l mete sekirite nan sistèm nan pou l ka rekòmanse pwosesis la pi vit posib. Men malerezman, revizyon  sistèm nan ka  lakòz yo anrejistre reta.

Ki jan moun ka evite pou yo pa viktim anban men magouyè?

Pran prekosyon avèk moun oubyen òganizasyon kap mande w lajan pandan yap fè w konprann yo ka fè yo apwouve dosye w la pi rapid, ouben yo ka fè ou jwenn yon moun patwone w.  Haitian Times te deja rapòte ensidan ki te rive kotè moun kap fè magouy yo te itilize sit entènèt jounal la pou fè anons kote yo tap chaje benefisyè yo kòb pou ede yo jwenn esponsò, poutan se pat yon bagay lejitim. Toujou verifye lejitimite nenpòt moun ki ofri tèt yo pou yo ede w, epi toujou asire w se avèk yon ofisyèl nan DHS wap travay oubyen yon konseye legal ou fè konfyans wap kominike.

Kisa ki fèt deja nan pwoblèm magouy yo dekouvri nan pwosesis la?

Depatman Sekirite Teritwa Etazini ap revize aplikasyon yo pou detekte tout magouy ak vyolasyon nan pwosesis la. Pou konnye a, yo pa  jwenn pwoblèm bò kote benefisyè yo dirèkteman pandan analiz dosye yo, men yap pran prekosyon pou asire entegrite pwosesis la bò kote moun kap aplike pou vi n  yon esponsè.

Ki lè pwogram nan ap rekòmanse?

DHS poko bay yon dat egzat kote lap rekòmanse pwosesis egzamen nouvo aplikasyon. Men ofisyèl yo di yap travay san pèdi tan pou rekòmanse pwosesis la pi vit posib, apre yo finn  mete tout mezi nesesè yo an plas pou ranfòse konfyans nan sistèm nan.

Pou nouvo detay sou tout desizyon DHS pran, li rekomande pou nou rete konekte ak chanèl ofisyel enstitisyon an e tout lòt sous enfòmasyon nou ka fè konfyans.

The post Ki sa ou dwe konnen sou poz nan pwogram imanitè Biden nan appeared first on The Haitian Times.